नमस्कार ! बळीराजावर आपले स्वागत आहे.

Shetkari Sanghatana Mobile App

शेतकरी संघटना मोबाईल ऍप
हे शेतकरी संघटनेचे अधिकृत मोबाईल ऍप असून शेतकरी संघटनेशी संलग्न राहण्यासाठी, घडामोडीची माहिती व वृत्तांत वाचण्यासाठी, शेतकरी संघटनेच्या आगामी कार्यक्रमांची/आंदोलनाची माहिती मिळवण्यासाठी तसेच युगात्मा शरद जोशींचे साहित्य वाचनासाठी अत्यंत उपयोगाचे आहे.  प्रत्येक शेतकऱ्याने हे ऍप इन्स्टॉल करणे आवश्यक आहे. अधिक माहितीसाठी http://www.baliraja.com/node/1589 येथे क्लिक करा. 
 
 
 

दान ढेकळाचं देऊ...

Raosaheb Jadhav's picture
लेखनप्रकार: 
पद्यलेखन स्पर्धा-२०१७
लेखनविभाग: 
छंदोबद्ध कविता

दान ढेकळाचं देऊ...

अंग घासत मातीशी
झाला फाळ टोकदार
हाती धरण्याला पेन
नाही धजत हे पोर......१

सांगा याला कोणीतरी
याचं परीक्षेचं साल
घाली बुडवून शाळा
तास नांगराचं खोल......२

झाले मन मातीमाती
लई सोसली रे कळ
तुझ्या डोळ्यात काजळ
शाई अक्षराच बळ.....३

काढ खूळ डोक्यातून
कर हिम्मत नव्याने
कर पांभर पेनाची
चाळ पुस्तकाची पाने.....४

शिक पोरा गड्या थोडं
बळ मातीतून घेऊ
व्यवस्थेला मग साऱ्या
दान ढेकळाचं देऊ......५

पोरा शिकण्यानं तुझ्या
फाळ होईल लेखणी
मुक्या बैलाच्याही तोंडी
जशी हिमतीची वाणी.....६

तुझं पाहून शिकणं
जीव धरील धरणी
ओल उडण्याआधी बा
पोरा कर तू पेरणी....७

रावसाहेब जाधव (चांदवड)
९४२२३२१५९६ rkjadhav96@gmail.com

Share

प्रतिक्रिया