जरा धीर धरा थोडा
(गीतप्रकार)

खिळी काढा जोतं काढा, औत खीनभर सोडा
उन्हं टळेल माथ्याचं, जरा धीर धरा थोडा ||धृ||

औत हाकूया जोमानं, ]पुढं ढेकळं ढेकळं
मागं ढेकळांचा भुगा, जरा सोसा काळ येळं
धरा दाबून रूमण्या, बैल कासऱ्यात ओढा
उन्हं टळेल माथ्याचं , जरा धीर धरा थोडा ||1||

पान्हा फोडाय वासरू, कास पिळाय गवळी
येता हुरड्यात सुगी, लुटे लुटारुंच्या टोळी
पिकातल्या कटाळ्याला घालू पायकुटी आढा
उन्हं टळेल माथ्याचं , जरा धीर धरा थोडा ||2||

मध गोळा करी माशी, त्याचं तोंडामध्ये इकं
कशी राखतीय पोळं जरा तिच्यावानी शिकं
जशात तसं वागायला करा सुळ्या दातदाडा
उन्हं टळेल माथ्याचं , जरा धीर धरा थोड ||3||

उभ्या भरल्या कणसा देता नरडीला ईळा
वर मोगरीचा मार खाली जीव चोळा मोळा
बस मुक्यान जगण आता तरी वाचा फोडा
उन्हं टळेल माथ्याचं , जरा धीर धरा थोडा ||4||

तुम्ही शेंगदाण्यावाणी आम्ही वर टरफलं
आम्हा अंगातोंडा माती तुम्ही आतं लालेलाल
नातं मातीशी सांगता चव कुमट थोबाडा
उन्हं टळेल माथ्याचं , जरा धीर धरा थोडा ||5||

- संजय आघाव परळी वै.