शेतक-यांचा राजा बळीराजा

Submitted by Rajiya Ismail J... on Tue, 14/11/2023 - 22:53

लेखनविभाग:

पद्यकविता

अष्टाक्षरी काव्यलेखन
शीर्षक - हक्क मिळवून देवू

कृषीवल संस्कृतीचा
देश हा शेतीप्रधान ,
'खेड्याकडे चला ' बोल
बापूजींचे ते महान......१

माझा शेतकरी करी
काळ्या आईचीच सेवा ,
राबतोय तो म्हणून
चाखतोय आम्ही मेवा.....२

ऊन ,वारा,पावसाची
नसे त्याला काही तमा ,
सर्जा राजा संगतीला
करी तो खातरजमा.......३

दीन कृषका आवळे
सावकारी कर्ज पाश,
गारपीट ,अवकाळी
होतो बिचारा हताश ........४

त्याच्या शेतमालासाठी
नसे योग्य हमीभाव ,
हक्कासाठी करतोय
आंदोलन नि उठाव.........५

संकटांची मालिका ही
थांबणार कधी पाही ,
देव पण घेत आहे
परीक्षाच जणू काही........६

शिवराय,ज्योतिबा नि
बाबासाहेबांची निष्ठा ,
कृषी हित जोपासले
त्यांची केली पराकाष्ठा......७

आता गरज आहे ती
त्यांना जगवण्याची,
हक्क मिळवून देवू
जागृतीच्या जाणिवांची......८

सौ रझिया इस्माईल जमादार अक्कलकोट जिल्हा-सोलापूर

Comments