वाढदिवसाची कविता

भेटत राहू असेच आपण
दरवर्षाच्या या दिवशी
आपण सारे मिळून वाढू
जन्मदिनाच्या या दिवशी

मी तर आहे युगायुगाचा
शाश्वत पंथी वाटसरू
या तुम्हीही आशिष द्याया
सर्व युगांच्या या दिवशी

जाणे येणे पुन्हा जाणे
पुन्हा येणे नित्य करू
सजवू मैफल सदैव अपुली
चिरंतनाच्या या दिवशी

पुनर्जन्म असतो की नसतो
वा चौऱ्याशीचा फेरा
हवी कशाला माथापच्ची
उल्हासाच्या या दिवशी

आदि-अनादी अनंत काळी
असेन मी! भास पुरेसा
येई मानवतेची दृष्टी
दिव्यत्वाच्या या दिवशी