'यंदा पेरू वावरात गांजा...

Submitted by गोपाल मापारी on Fri, 30/09/2016 - 17:35

लेखनप्रकार:

पद्यलेखन स्पर्धा-२०१६

लेखनविभाग:

गीतरचना

वऱ्हाडी गीत....
'यंदा वावरात पेरू गांजा....

पुरत नाही राज्या आता,तुरी पऱ्हाटीचा लांजा.
अवंदा पेरू वावरामंदी, सिधा-सरका गांजा.

ना मजुरीचं काम,ना मजूर आन्याची बीमारी.
संध्याकाळी एक चिलम,इतकीच रोजदारी.
चोवीस तास तथी सारे, मुक्कामी रायतीन.
बुढेेबाडे अन नैतुरने,नाई वावरात मायतीन.
पांडीतला सखा'बुडा,नागो सुताराचा संज्या ||1||
यंदा पेरू वावरात..

तीन वर्षाचा कापूस,माया घरामंदी सळला.
त्याच्या किती गाद्या बनवू,मले ईचार पळला.
त्याच्यासाठी मीनं किती,घेतले बाप्पा टोले.
नीरा पाणी टाकू टाकू,जगवून राह्यलो त्याले.
अर्ध्या गंजीचा पोट्टयाईन,बनवून टाकला मांजा||2||
यंदा पेरू वावरात....

नाही विका लागत माल,फिरून दारोदारी.
साऱ्या मालाची होईन,घरून डिलिव्हरी.
ना मार्केटचा लोचा,नाई अडतीचा बी ताण.
सरकार कोणाचबी असो,भाव आपल्या मतानं.
मंग निवडून येवो 'कमळ',की निवडून येवो 'पंजा'||3||
यंदा पेरू वावरात...

माह्या माल आल्यावर,काऊन भाव घसरते?
मले सांगा एकाएकी, कशी मंदी पसरते?
कोणी हुंगत नाई माल,त्याचं जागीच होते खत.
जशी लगन झाल्यावर,झाली होती माह्यी गत.
बेपाऱ्याची होते चांदी,आपुन वाजोत बसा झांजा||4||
यंदा पेरू वावरात......

जवा बजाराले तुयी,चंची रिकामी वाटीनं.
चार पानं तोडून नेजो,पुरा बाजार होईनं.
पिंट्याले बूट घेजो,'बाली'ले मॅक्सी घेजो.
दोन पानं मंदिराच्या,दानपेटीत दान देजो.
कापसावानी रायतीन,घरी पैशाच्याबी गंजा.||5||
यंदा पेरू वावरात.....

कवि--गोपाल तुळशिराम मापारी,अकोला
(9423484829)

Log in or register to post comments
9505 reads

Comments

तरी मी म्हणलोच

Raj Pathan
Fri, 30/09/2016 - 17:54. वाजता प्रकाशित केले.

मापारी कुठं अंडरग्राउंड तर नाय झाला!
वाघा रे वाघा...........

धन्यवाद
- Log in or register to post comments

प्रवेशिकेचे मनपूर्वक

गंगाधर मुटे
Sat, 01/10/2016 - 11:33. वाजता प्रकाशित केले.

प्रवेशिकेचे मनपूर्वक स्वागत.
अभिनंदन....! :congrats: :congrats:

शेतकरी तितुका एक एक!
- Log in or register to post comments