शेतक-यांचा राजा बळीराजा

Submitted by Rajiya Ismail J... on Tue, 14/11/2023 - 22:13

लेखनविभाग:

छंदोबद्ध कविता

काळी माय माझी आई
पिकविते दाणे मोती ,
तिच्यावर पोट भरे
माझी नका विकू शेती.....१

आहे वडिलोपार्जित
लाख मोलाची जमीन ,
तिच्या मशागतीसाठी
कष्ट झेलितो कठीण........२

शेतकरी दादा मी हो
आहे पोशिंदा जगाचा ,
पाणी करून रक्ताचे
मळा फुलवी पिकाचा.....३

सर्जा राजा संगतीने
औत हाकतो हाकतो ,
दिनरात माळरानी
मोत्या राखणी करतो......४

जिरायती, बागायती
असो कसलीही शेती ,
कष्टेविण कसे येई
पीकपाणी ,दाणे मोती?....५

लेकरांच्या मायेपोटी
फासदोर केला दूर ,
माझ्याविना कसा निघे
चुलीतून मग धूर ?.......६

पीक काढणीला ढग
एकाएकी होई गोळा ,
पुरामध्ये वाहे पीक
होई स्वप्नांचा पाचोळा.....७

जाणा आमच्या कष्टाला
आम्हां द्या हो पीक हमी ,
हात मदतीचा द्यावा
होई पिकाची बेगमी......८

शेती आमच्या हक्काची
द्यावे आम्हा पाठबळ,
अन्नधान्य उत्पादन
नाही होणार आबाळ.....९

शेती आमच्या हक्काची
नका करू तिचे मोल ,
नका विकू माझी शेती
पाचू रत्न अनमोल......१०

सौ रझिया इस्माईल जमादार अक्कलकोट जिल्हा-सोलापूर

Comments