गझल :अस्तित्व भारताचे

व्यवसाय हा कृषीचा झाला जुगार आहे.
झाली असून मोडी पेरा दुबार आहे.

हा कोणत्या तऱ्हेचा सांगा उतार आहे.
मी फेडतो तरीही वाढत उधार आहे.

कृषिकर्म एक हुकमी पत्ता असून देखील,
खेळात मिळकतीच्या त्याचीच हार आहे!

मरण्याशिवाय नाही पर्याय कोणताही,
जगण्यास पण तरी मी करतो पुकार आहे.

सर्वत्र इंडियाचे प्राबल्य आज असुनी,
अस्तित्व भारताचे देशात ठार आहे.

घाट्यात कास्तकारी गेली तरी इथे या,
खात्यात शेतकीच्या भारी पगार आहे.