![]() ![]() बळीराजावर आपले स्वागत आहे. |
धोरण
नशिबात आहे बा च्या
काळी ढेकळं ढेकळं
कधी मिळेल हो बापा
माझ्या कष्टाची भाकर !धृ!
किती कष्ट केले रानी
स्वप्न सजवूनी मनी
घास हिरावतो तोंडातून
कसा आहे रे हा पाणी
कशी जगतात बघा
काळ्या मायेची लेकरं
कधी मिळेल हो बापा
माझ्या कष्टाची भाकर !१!
बिज निघेल हे कसं
नाही राहीला भरोसा
जुगार खेळून शेतीचा
झाला रिकामा हा खिसा
चॉकलेट देऊनि बापा
घर केलीया पोकर
कधी मिळेल हो बापा
माझ्या कष्टाची भाकर !२!
बाप थकला रे माझा
भार कर्जाचा पेलून
गळ्या आवरतो दोर
झाडावर झुलून
छाया हरवूनी कशी
पोरकी झालीया पाखरं
कधी मिळेल हो बापा
माझ्या कष्टाची भाकर !३!
असं आलं ते हिरवं
कर्जमाफीचं गाजर
आशा प्रफुल्लीत झाल्या
आली आडवी माजर
थापा देवूनिया बापा
किती झालीया मुजोर
कधी मिळेल हो बापा
माझ्या कष्टाची भाकर !४!
कुठं गेले ते कैवारी
कुठं चाललं धोरण
पट्टी बांधूनी डोळ्याला
बघता बापाचं मरण
राख झालीत स्वप्नांची
कधी जागेल सरकार
कधी मिळेल हो बापा
माझ्या कष्टाची भाकर !५!
*गितकार*
- रंगनाथ तालवटकर
चिखली (कोरा)
त. समुद्रपूर जि.वर्धा
७३८७४३९३१२
प्रतिक्रिया
प्रवेशिकेचे मनपूर्वक स्वागत.
प्रवेशिकेचे मनपूर्वक स्वागत. अभिनंदन....!
![Congrats](http://baliraja.com/sites/all/modules/smiley/packs/Shiva/congrats.gif)
शेतकरी तितुका एक एक!