माय मराठीचे श्लोक...!!

प्रकाशीत

(रानमेवा काव्यसंग्रहात प्रकाशित)

माय मराठीचे श्लोक...!!

नमो मायभाषा! जयोस्तुss मराठी!

तुझे शब्द सान्निध्य माझे ललाटी

जडो ध्यास हा छंद व्यासंग बोली

घडो हे समस्ता! नमो मायबोली..!!

तुझे शब्दलालित्य सूरास मोही

तसा नादब्रह्मांस आनंद होई

सुरांच्या नभी सूरगंगा नहाली

घडो हे समस्ता! नमो मायबोली..!!

जरी वेगळी बोलती बोलभाषा

अनेकांत एकत्व ही प्राणभाषा

असे भाग्य आम्हां मराठी मिळाली

घडो हे समस्ता! नमो मायबोली..!!

असा मावळा गर्जला तो रणाला

तसा घोष "हर हर महादेव" झाला

मराठी तुतारी मराठी मशाली

घडो हे समस्ता! नमो मायबोली..!!

अभय एक निश्चय मनासी करावा

ध्वजा जीव ओवाळुनी फ़डकवावा

सदा शब्द वाणीत ये सर्वकाली

घडो हे समस्ता! नमो मायबोली..!!

- गंगाधर मुटे

....................................................................

(रानमेवा काव्यसंग्रहात प्रकाशीत. दि. १०.११.२०१०)

....................................................................

श्रीमद्‍ भागवत ज्ञानयज्ञ सप्ताहामध्ये ह.भ.प. प्रकाश महाराज वाघ आणि समुह यांनी माय मराठीच्या श्लोकाचे गायन केले.

ऐकण्यासाठी क्लिक करा.

--------------------------------------------------------------------------------------------

गायक - विनायक वानखेडे

गीत- गंगाधर मुटे

बेन्जोवादक - देविदास बिजवार

तबलावादक - प्रविण खापरे

हार्मोनियम - सुरेश सायवाने

--------------------------------------------------------------------------------------------

Ringtone Download

माय मराठीचे श्लोक - रिंगटोन डाउनलोड करा.

वेळ : ३२ सेकंद - MP3 आकार - 1.22 MB