पोशिंद्याची शोकांतिका

पोशिंद्याची शोकांतिका

सोनेरी पाश सावकारी 'विळखा' लय भारी,
कर्जात बुडाली शेती मेला शेतकरी ||धृ||

एका जमान्यामंदी होता शेतकरी राजा |
धुर सोन्याचा निंघे देशात गाजावाजा ||
दुष्काळ पडला पैशान नडला झाला कर्जबाजारी
||१||

लय काबाडकष्ट करुनी नाही सुखी |
वाट ढगाची पाहून मनात झाला दुखी ||
थकून गेला 'खल्लास' झाला डोळ्यांत आल्या सरी
||२||

घरी बायकापोरं उपाशीपोटी मरे |
'मायबाप बिचारे' मनामंधी हो झुरे ||
शासन - अजगर तोंड फाडून टपून बसला शिरी
||३||

चिंता दुसर्‍याची करतो मर-मर कष्टकरी |
देतो रोजगार इतरां दुसर्‍याला भाकरी ||
'एकांत' म्हणतो बळी देऊनी झाला स्वत: भिकारी
||४||

(गोडवा )
नको जाऊ बळी तू होईल ते होऊ दे |
आग लागो जगाले सपान तुव्हं फुलू दे ||
अक्कल ठिकाणी आल्यावर तू होशील रे 'पुढारी'
||५||

एकांत

नरेंद्र भाऊराव गंधारे
63-संत कबीर वार्ड, हिंगणघाट
जिल्हा- वर्धा 442301

संपर्क

9284151756