जगणे कास्तकाराचे...

कौतूक तू सांगू नको खोट्या विकासाचे
उघडून डोळे हाल बघ घायाळ देशाचे

पडताच मजला स्वप्न काशी चारधामाचे
सर्वात आधी पाय धरतो मायबापाचे

शेअर्सचे हमखास दर भिडतात गगनाला
का भाव कोसळतात कायम शेतमालाचे?

कृत्ये तुझी आहेत सगळी रावणावाणी
दुनियेपुढे घेतोस केवळ नाव रामाचे

बांधावरी ज्या घेतला गळफास बापाने
नाही रुजत कुठल्याच तेथे बीज झाडाचे

पारख करायाला गुणांची वेळ कोणाला
पडले जगाला फक्त माझ्या जात धर्माचे

त्याच्याचपासुन जन्मले आहे तरी सुद्धा
अस्तित्वही नाही दिसत शहरात गावाचे

घरदार ना शेजार ना सरकार कोणीही
आहेस तू केवळ तुझ्या कारण विनाशाचे

दिसण्यावरी गंधावरी होते फिदा दुनिया
नाही दिसत कोणासही काटे गुलाबाचे

मातीमधे अवघ्या कमाईला उधळल्यावर
समजेल जगणे काय असते कास्तकाराचे

विसरायचो नाही कधीही मोल घामाचे
आयुष्य जगतो आजही मी स्वाभिमानाचे

--- चंद्रकांत देवराव कदम (सन्मित्र)
नांदेड (मो.9921788961)