।*नावहीन गाववेदना*।
जगायचा हिशोब गड्या
तुझ्यापुढे मांडतो आहे
विखुरलेल्या गवताची
काडीकाडी बांधतो आहे........1
बांधावरल्या भांडणातच
पिढ्या साऱ्या झाल्या खोरी
अज्ञानाचे वाढवीत तण
दलालांच्या पिकल्या बोरी........2
राजकारण गावकीचे
भावकीचेही उसवी टाके
हाती धरल्या फावड्याने
भावाचेच फोडतो डोके.........3
वास भिजत्या मातीचा
बेंबीदेठी भिनला पाहिजे
शेजाऱ्याच्या वावरातही
वारस तुझा रांगला पाहिजे.......4
एकोप्याचे मांड गणित
कानामनात कर पेरणी
जागतिकीकरणासाठी
बांधाबांधात कर बांधणी.........5
मातीपोटी पोसले वैर
मुळ्या उकरुन खांडतो आहे
नावहीन गाववेदनेतून
हुंकार नवा सांडतो आहे.........6
* रावसाहेब जाधव(चांदवड)*
(9422321596)

वाचकांनी प्रतिसाद नोंदवल्यास मार्गदर्शन मिळेल
Raosaheb Jadhav
:R: वाचकांनी प्रतिसाद नोंदवल्यास मार्गदर्शन मिळेल
तरी मार्गदर्शनपर प्रतिसादाची अपेक्षा.
आता अंतर्गत समस्यांचाही सामना
Raosaheb Jadhav
आता अंतर्गत समस्यांचाही सामना करण्याची वेळ आली आहे.
प्रबोधनाची गरज आहे.
लेखनाचा विषय
admin
लेखनाचा विषय : मा. शरद जोशी
(लेखन शरद जोशी या व्यक्तीमत्वाशी निगडीत व अधोरेखीत करणारे असावे)