कृषिकहो तुमच्यासाठी..(विडंबन)

राजकीय धुरंधरांचा, घास रोज अडतो ओठी
कृषिकहो तुमच्यासाठी, श्रमिकहो तुमच्यासाठी |ध्रु|

वावरतो फिरतो आम्ही, सत्तेत विरोधी बसतो
मनी विचार सदैव आमुच्या, दिवट्या चिमण्यांचा असतो
परि आठव येता तुमचा, देऊ आश्वासने वांझोटी |१|

राबता उपाशी तुम्ही, जगतास अन्न देऊनी
तुमच्यास्तव आमची सत्ता, तुमच्यास्तव ही घराणी
हमीभाव बाजुला करुनी, आम्ही कमावितो कोटी |२|

उगवला दिवस हा पळतो, अंधार दाटतो रात्री
आम्ही विदेशात मग पळतो, तुमच्याच खिशाला कात्री
करू विमानात बैसुनी, दुष्काळ पाहणी मोठी |३|

कर्जास बुडविले पार, आम्हीच जाणिले थोर
का जीवास लावी घोर, का गळ्यात घेई दोर
सरसकट माफी करतो, टाकुनी अंशतः अटी |४|

दिवाकर जोशी
परळी वैजनाथ जि.बीड