॥सांगा तुकारामा : अभंग॥

॥सांगा तुकारामा : अभंग॥



सांग तुकोराया तुझा । विठू कुठे मेला? ।

कर्जापायी भक्त त्याचा । स्मशानात गेला ॥धृo॥



पुजा, अर्चा, भक्तिभाव । आरतीचे ताट ॥

सर्वकाळ सत्संगाची । सोडली ना वाट ॥

तरी का रे अल्पायुषी । श्वास बंद केला ॥१॥



जित्रुपाचा दोर हाती । ओठी विठू नाम ॥

रात्रंदिन पाण्यावाणी । गाळलाय घाम ॥

तरी का रे चोपडला । कुंकवाने शेला ॥२॥



तुझा देव, धर्म तुझा । शोषकांचा साथी ॥

घोर, दु:ख, हीनता, गरिबी । पोशिंद्याचे माथी ॥

कळेना अभय कैसा । विठूचा झमेला ॥३॥



                                   - गंगाधर मुटे "अभय"

~~~~~~~~~~~~~~~~~~~~~~~~~~~~~~