कोण तुम्ही व्हा रं ?

जीवावर जीव जगता, कोण तुम्ही व्हा रं ?
डोमकावळ्यापरस थूतर तुमचं कारं !।धृ।।

ज्याचे खाता त्याचा विसर पडतोया तुम्हा
कुठे भरुन द्याल हा तर संगीन गुन्हा
कुऱ्हाडीचा दांडा, गोतास काळ ।।१।।
डोमकावळ्यापरस थूतर तुमचं कारं !

जगाचा पोशिंदा किती हैरान झाला
कुठून कसा हाती त्याच्या गळफास आला
गरीबांचा काळ, मोठ्यांचा प्रतिपाळ ।।२।।
डोमकावळ्यापरस थूतर तुमचं कारं !

मुका नको राहू असा हो तु हुशार
उठ बापा आता तरी लेखनी उगार
शिकतील बाळ, तर फेडतील काळ ।।३।।
डोमकावळ्यापरस थूतर तुमचं कारं !

शब्दार्थ:
डोमकावळा=काळा कावळा
परस=पेक्षा
थुतर=तोंड
कारं=मलिन
संगीन=घोर/दंडनीय
गोतास=आप्त/स्वजनांस
काळ=मृत्यु
प्रतिपाळ=पाठराखन/संरक्षण

म्हणी:
कुऱ्हाडीचा दांडा, गोतास काळ=स्वजनांचा घात करणे.

गरीबांचा काळ, मोठ्यांचा प्रतिपाळ=मोठ्या लोकांशी चांगले वागणे व गरीब लोकांस त्रास देणे.

शिकतील बाळ, तर फेडतील काळ=मुले शिकून सवरुन मोठे झाल्यास विपन्नावस्था दूर करण्यास समर्थ होतात.